FSN

Áfallahjálp í Neskaupstað

Sjúkrahúsið í Neskaupstað (FSN) er ábyrgt fyrir skipulagi og umsjón áfallahjálpar í Neskaupstað.

Sérstakt áfallahjálparteymi er starfrækt þar á vegum Heilbrigðisstofnunar Austurlands (HSA).

Áfallahjálp er m.a. hluti af áætlun heilbrigðisþjónustunnar í skipulagi vegna hópslysa og almannavarna.

Markmið áfallahjálparteymis eru að

• Stuðla að betri aðlögun eftir áfall.
• Fyrirbyggja alvarlegar afleiðingar áfalla.
• Fræða um viðbrögð og úrræði við áföllum.

Ef óskað er eftir aðstoð teymisins má hringja í vakthafandi hjúkrunarfræðing sjúkradeildar í síma 470-1453 sem mun fylla út beiðni til teymisins og meta þörf fyrir að virkja teymið.

Áfallahjálparteymi í Neskaupstað

• Áfallahjálparteymi FSN er skipað a.m.k. fjórum fulltrúum sem starfa innan FSN. Yfirstjórn FSN er ábyrg fyrir tilnefningu fulltrúa í teymið.
• Fulltrúar teymisins eru fagmenntaðir einstaklingar með þekkingu á áfallahjálp, s.s. læknar, hjúkrunarfræðingar, ljósmæður, sálfræðingar, félagsráðgjafar, iðjuþjálfar, sjúkraliðar eða sjúkraþjálfarar sem sótt hafa tilskilin námskeið í áfallahjálp.
• Fulltrúi heilbrigðisþjónustunnar í Almannavarnarnefnd Suður-Múlasýslu er annaðhvort í teyminu og/eða er tengiliður nefndarinnar við teymið.

Áfallahjálparteymið:

• Anna Þóra Árnadóttir, sjúkraþjálfari formaður
• Anna Sigurveig Ólafsdóttir, hjúkrunarfræðingur
• Oddný Ösp Gísladóttir, hjúkrunarfræðingur og ljósmóðir
• Sigurlaug Sveinsdóttir, sjúkraliði
• Þórhalla Ágústsdóttir, hjúkrunarfræðingur

7. apríl 2007

Vígsluathöfn nýbyggingar FSN

Í gær var haldin vígsluathöfn nýbyggingar FSN, en framkvæmdir við nýbygginguna hafa staðið í uþb. 2 ár. Siv Friðleifsdóttir heilbrigðisráðherra klippti á borða á nýju endurhæfingardeildinni og tók hana þar með formlega í notkun. Fjölmargir gestir voru mættir, þar á meðal Jón Kristjánsson sem var heilbrigðisráðherra þegar framkvæmdir hófust, Valgerður Sverrisdóttir utanríkisráðherra ásamt tveimur af þingmönnum kjördæmisins og mörgum öðrum. FSN voru veittar margar veglegar gjafir við þetta tækifæri, sem munu koma að góðum notum við þjónustu skjólstæðinga sjúkrahússins.
Er velunnurum sjúkrahússins þakkað kærlega fyrir velvildina.

19. janúar 2007

Hálfrar aldar afmæli FSN

Í gær var haldið upp á hálfrar aldar afmæli Fjórðungssjúkrahússins með kaffiveitingum fyrir starfsfólk og velunnara sjúkrahússins. Við þetta tækifæri var tekið við góðum gjöfum sem sjúkrahúsinu hafa borist á undanförnum dögum. Um er að ræða nýtt og afar fullkomið ómskoðunartæki sem Hollvinasamtökin gáfu, rafdrifið sjúkrarúm frá A. Karlssyni seljanda ómskoðunartækisins, og fjögur rafdrifin sjúkrarúm frá Samtökum útgerðarmanna í Neskaupstað. Nýja ómskoðunartækið leysir af hólmi 5 ára gamalt tæki og er af nýrri og gjörólíkri kynslóð. Með því verður hægt að gera skoðanir á hjarta og æðum til viðbótar við þær skoðanir sem gerðar hafa verið með gamla tækinu, þ.e. fósturskoðanir og ómskoðanir á gallvegum. Hjón í Neskaupstað afhentu veglega peningagjöf, og er öllum þakkað hjartanlega fyrir velvildina.
Fyrirhugað er svo að halda upp á afmæli sjúkrahússins á enn veglegari hátt í mars, þegar nýbyggingin verður afhent.

8. júní 2006

Enn hefur ekki tekist að fastráða svæfingalækni við FSN, og hefur það valdið óþægindum og skerðingu á þjónustu við íbúa fjórðungsins. Þó svo að reynt sé að halda uppi mönnun með afleysingum að sunnan tekst það ekki alltaf, og það koma dagar þar sem enginn svæfingalæknir er við sjúkrahúsið. Helst hefur þetta komið niður á fæðingarþjónustunni, en ekki er hægt að hafa fæðingardeildina opna þegar enginn er svæfingalæknirinn, þar sem ekki er hægt að bregðast við erfiðleikum í fæðingu á fullnægjandi hátt.
Framkvæmdum miðar vel við nýbyggingu sjúkrahússins og eru á áætlun.
Árlegur tiltektardagur starfsfólks FSN og heilsugæslu var haldinn í síðustu viku og var lóðin snyrt. Deginum lauk svo með grillveislu í góðu veðri.
Nýr geislafræðingur mun hefja störf í byrjun júlí, og þar með verður loksins hægt að nýta sneiðmyndatækið að fullu.

22.des 2005

Fréttir af sjúkrahúsinu
Kristín Guttormsson, sem verið hefur svæfingalæknir sjúkrahússins í áratugi, lét af störfum í lok október fyrir aldurs sakir. Henni var haldið kveðjuhóf og þakkað fyrir framlag sitt í þágu heilbrigðisþjónustu við íbúa fjórðungsins.
Ekki hefur fengist nýr svæfingalæknir í stað hennar, en eins og er skiptast læknar frá svæfingadeild Landspítalans á að manna svæfingadeildina.

Ný röntgentæki voru tekin í notkun í vetur, og leysa af hólmi löngu úrelt tæki frá 1970. Nýju tækin eru frá General Electric, og jafnframt var tekinn í notkun stafrænn framköllunarútbúnaður, sem beintengdur er við röngendeildina á FSA. Þannig eru nú allar röntgenmyndir sem teknar eru á sjúkrahúsinu sendar norður, og er lesið úr þeim þar af röntgenlæknum FSA. Eykur þetta gæði röntgenþjónustunnar til muna.

Vinnu við endurbyggingu eldri hluta sjúkrahússins miðar vel, og fer vinnu við þak og turn að ljúka.

Talsverð fjölgun hefur orðið á íbúum fjórðungsins undanfarið ár, og vegur þar þyngst fjölgun íbúa á Reyðarfirði, en þar er byggin álvers Alcoa í fullum gangi. Einnig er margt um manninn í Kárahnúkum. Mest er um útlendinga frá ýmsum löndum, en einnig eru einhverjir íslendinar að störfum þar. Enda hefur komum útlendinga á sjúkrahúsið fjölgað til muna. Árið í ár er metár í starfsemi sjúkrahússins, innlagnir hafa aldrei verið fleiri, sem og verk á skurðstofu.

3. júlí 2005
Afhending sneiðmyndatækisins og fyrsta skóflustungan tekin af nýbyggingu sjúkrahússins

Jón Kristjánsson heilbrigðisráðherra klippti á borða og tók þar með sneiðmyndatækið sem er gjöf frá Hollvinasamtökum FSN, formlega í notkun þann 22. júní s.l. Við sama tækifæri afhenti fyrir hönd Hollvinasamtakanna, Stefán Þorleifsson fyrrverandi framkvæmdastjóri FSN, sjúkrahúsinu gjafabréf fyrir vökvadælu sem notuð er til að sprauta skuggaefni í sjúklinga þegar gerðar eru sneiðmyndarannsóknir. Heilbrigðisráðherra tók einnig fyrstu skóflustunguna að endurbyggingu gömlu sjúkrahússbyggingarinnar. Það er óhætt að fullyrða að um tímamót séu að ræða í heilbrigðisþjónustu við íbúa fjórðungsins með tilkomu sneiðmyndatækisins sem hefur geysilegt notagildi til sjúkdómsgreininga, og upphafs endurbyggingar sjúkrahússins, sem mun rýma endurhæfingardeild og hjúkrunardeild þegar byggingu líkur.
Tengill á heimasíðu Framkvæmdasýslu Ríkisins, þar sem hægt er að sjá niðurstöðu útboðs og samningskaupa vegna endurbyggingarinnar, ásamt verkefniskynningu, er hér

16. júní 2005hér
Tölvusneiðmyndatækið komið og framkvæmdir að hefjast við endurnýjun gömlu spítalabyggingarinnar

Tölvusneiðmyndatækið sem fyrirtæki og einstaklingar í Fjraðabyggð gáfu sjúkrahúsinu með milligöngu Hollvinasamtakanna er komið, búið að setja upp og prófa. Tækið var í fullri notkun í síðustu viku meðan verið var að prófa það og voru gerðar um 30 rannsóknir sem þóttust heppnast mjög vel. Tækið verður ekki tekið í venjubundna notkun fyrr en með haustinu, en þá á að vera búið að koma á tengingu við röntgendeildina á Akureyri til að hægt sé að lesa úr myndunum þar. Einnig á eftir að ráða geislafræðing til FSN.
Búið er að semja við Viðhald Fasteigna um endurnýjun gömlu sjúkrahúsbyggingarinnar, og hefjast framkvæmdir 27. júní nk. Í húsinu verður hjúkrunardeild og endurhæfingardeild, ásamt eldhúsi og skrifstofum.
Af þessum tilefnum verður móttaka á sjúkrahúsinu 22. júní, þar sem sneiðmyndatækið verður afhent formlega, og Jón Kristjánsson heilbrigðisráðherra mun taka fyrstu skóflustunguna að endurbyggingunni

9. febrúar 2005
Bylting í röntgenþjónustu FSN
Miklar breytingar standa nú fyrir dyrum varðandi myndgreiningarþjónustu Fjórðungssjúkrahússins í Neskaupstað (FSN).
Heilbrigðisráðuneytið hefur ákveðið að veita fé til kaupa á nýjum röntgentækum fyrir sjúkrahúsið á þessu ári og verða tækin tengd stafrænum búnaði þannig að filmuframköllun verður óþörf þar sem allar röntgenrannsóknir verða tölvutækar. Vegna fólksfjölgunar og vaxandi umsvifa á Austurlandi hafa svo læknar FSN margoft viðrað og rökstutt hugmyndir um kaup á sneiðmyndatæki til að bæta enn frekar myndgreiningarþjónustu og þar með viðbúnað FSN. Meðal röksemda fyrir staðsetningu sneiðmyndatækis á Austurlandi er fjarlægð frá Reykjavík og Akureyri, auk tíðra ferðalaga Austfirðinga í sneiðmyndarannsóknir með tilheyrandi ferðakostnaði greiddum af ríkinu, auk annars kostnaðar, vinnutaps og óhagræðis. Árlega fara íbúar af Austurlandi í um 500 sneiðmyndarannsóknir skv. tölum frá Tryggingastofnun ríkisins og Fjórðungssjúkrahúsinu á Akureyri (FSA) auk áætlaðrar tölu frá Landspítala Háskólasjúkrahúsi. Miðað við tíðni sneiðmyndarannsókna á upptökusvæði FSA sem er um 0,065 rannsóknir/íbúa má áætla að fjöldi slíkra rannsókna á FSN gæti verið um 700 á ári. Rekstarkostnaður sneiðmyndatækis á FSN hefur verið áætlaður um 8 milljónir króna en á móti koma svo greiðslur sjúklinga sem gætu numið um 6 milljónum króna. Samkvæmt þessari áætlun myndi rekstrarkostnaður sneiðmyndatækis á FSN jafngilda um 9% af þeim 90 milljóna króna í árlegum ferðakostnaði sem ríkið greiðir vegna ferðalaga Austfirðinga til lækninga og rannsókna.

Ofangreindar hugmyndir um kaup á sneiðmyndatæki hafa verið kynntar forráðamönnum og læknaráði Heilbrigðisstofnunar Austurlands (HSA), landlækni og heilbrigðisráðherra og almennt hlotið góðar undirtektir. Ljóst er þó að opinbert fjármagn fæst ekki á næstunni til þessara kaupa enda er endurnýjun röntgentækja hér og víða annars staðar á landsbyggðinni forgangsverkefni heilbrigðisráðuneytisins.

Á fundi Hollvinasamtaka FSN þann 30.desember s.l. fengu svo kaupin á sneiðmyndatæki óvæntan byr í seglin þegar ákveðið var að hefja almenna fjársöfnun í kjölfar loforðs eins styrktaraðila um verulegt fjárframlag til verkefnisins. Þá þegar lá fyrir afar hagstætt tilboð um kaup á sneiðmyndatæki frá A. Karlssyni sem gilti til áramóta. Gengið var svo frá kaupunum á gamlársdag þar sem góðar líkur þóttu á framlögum fleiri styrktaraðila. Jafnframt var skipuð söfnunarstjórn sem í sitja þeir Stefán Þorleifsson, fyrrverandi forstöðumaður FSN, séra Sigurður Rúnar Ragnarsson, formaður Hollvinasamtakanna, Smári Geirsson, forseti bæjarráðs Fjarðabyggðar og Björn Magnússon, forstöðulæknir FSN.

Tækið sem keypt hefur verið er hraðvirkt fjölsneiða spíraltæki (Hi SPEED Dual CT Scanner System) frá General Electric í USA sem talið er henta þörfum FSN og Ausfirðinga mjög vel. Verðið er mun hagstæðara en á sambærilegum tækjum á undanförnum árum eða um 18 millj. króna án vsk.

Talsverðar breytingar þarf að gera á húsnæði FSN til að geta tekið á móti tækinu og mun sú vinna hefjast strax og væntanlega ljúka á næstu vikum.

Til að tryggja að faglega verði staðið að röntgenrannsóknum á FSN verður ráðinn til starfa geislafræðingur, auk þess sem komið verður á tölvutengslum við myndgreiningardeild FSA og röntgenlækna þar sem annast munu faglega ráðgjöf og úrlestur þeirra röntgen-og sneiðmyndarannsókna sem teknar verða á FSN. Þá er gert ráð fyrir því að komið verði upp skoðunarskjám fyrir röntgen og sneiðmyndir á öllum heilusgæslustöðvum innan HSA.

Sneiðmyndataka mun auðvelda mjög greiningu fjöláverka alls konar, s.s. heila-og mænuáverka sem því miður má búast við í vaxandi mæli hér eystra vegna aukinna umsvifa og umferðar. Þá munu sneiðmyndarannsóknir auðvelda mjög greiningu sjúkdóma frá flestum líffærakerfum s.s. æxla, æðagúla, blóðsega, heilablæðinga, blóðtappa, lungnasjúkdóma, líffærabreytinga o.fl. Með kaupum á sneiðmyndatæki er stigið eitt stærsta framfaraskref í heilbrigðisþjónustu á Austurlandi á undanförnum árum og ljóst er að gríðarleg breyting verður á þjónustustigi FSN og reyndar á öllu starfssvæði HSA. Gæði röntgenrannsókna batna verulega og meðferð verður markvissari. Loks mun framþróun myndgreiningar á Austurlandi leiða til sparnaðar ríkisins en ekki síst verulegs hagræðis og ábata fyrir skjólstæðinga Heilbrigðisstofnunar Austurlands.

Endurbygging eldri byggingar FSN
Nú stendur fyrir dyrum að bjóða út öðru sinni endurbyggingu eldra húsnæðis FSN sem tekið var í notkun 1957. Viðhald byggingarinnar hefur verið mjög ábatavant og er húsnæðið nú í niðurníðslu. Skipt verður um þak húsinns og lögun þess breytt þannig að heilmikið viðbótarrými skapast á efstu hæðinni sem öll verður tekin í notkun fyrir sjúkraþjálfun og iðjuþjálfun, auk þess sem þar verður þolprófsherbergi og aðstaða fyrir hjúkrunarfræðinga og móttöku.

Á annari hæð verður innréttuð 12 rúma hjúkrunardeild með vaktherbergi, baðaðstöðu og setustofu.

Neðsta hæðin verður eftir endurbyggingu áfram nýtt undir eldhús og skrifstofur. Þá verður byggður utan á húsið nýr lyftuturn sem einnig rúmar fundarherbergi á efstu hæð og setustofu á annari hæð. Frá turnbyggingunni verður byggður tengigangur niður í eldri aðstöðu sjúkraþjálfunar þar sem sundlaugin er staðsett.

Ljóst er að mikið rask mun fylgja þessum framkvæmdum en að því er þó stefnt að starfsemi FSN skerðist sem allra minnst á framkvæmdatímabilinu sem vonast er til að ljúki á u.þ.b. einu ári.

17. október 2004
Fréttir af endurnýjun eldra húsnæðis FSN
Til stendur að endurnýja eldri byggingu FSN, sem er illa farin og þjónar hlutverki sínu ekki lengur. Nánari upplýsingar er að finna á heimasíðu Framkvæmdasýslu Ríkisins

25. september 2004
Nýr rekstrastjóri við FSN
Valdimar O Hermannsson hóf störf sem rekstrarstjóri við FSN 1. ágúst s.l. Hann hefur fjölbreytta reynslu úr atvinnulífinu. Um leið og við bjóðum hann velkominn til starfa þökkum við fyrrverandi rekstrarstjóra Þóri Aðalsteinssyni fyrir vel unnin störf undanfarin ár.

26. mars 2004
FSN fær ný speglanatæki að gjöf
Hollvinasamtök FSN afhentu sjúkrahúsinu glæný maga- og ristilspeglanatæki frá Pentax 26. mars s.l. Um er að ræða dýrustu gjöf sem sjúkrahúsinu hefur borist. Það voru fyrirtæki, einstaklingur, og stofnanir í Fjarðabyggð sem gáfu peninga í söfnunina, sem farið var í að frumkvæði lækna FSN. Þessir aðilar eru: Ónefnt fyrirtæki í Fjarðabyggð, Sparisjóður Norðfjarðar, Aðalsteinn Jónsson, Rauða Kross deildir í Fjarðabyggð, Kvenfélögin í Fjarðabyggð, Eskja og Krabbameinsfélag Austfjarða. Stendur sjúkrahúsið í mikilli þakkarskuld við ofannefnda.

Nýju tækin leysa af hólmi gömlu speglanatækin sem keypt voru 1997. Þau hafa mikið verið notuð og reynst vel. Síðan þá hafa orðið geysilegar tækniframfarir við gerð slíkra tækja, og eru myndgæði nýju tækjanna margfalt betri. Með tilkomu þeirra aukast gæði maga - og ristilspeglana sem framkvæmdar eru við sjúkrahúsið til muna, en speglanir eru stærsti einstaki þátturinn í rannsóknum á meltingarvegi. Gömlu tækin verða eftir sem áður í eigu FSN, og notuð þegar á þarf að halda.

Við sama tækifæri afhentu Hollvinasamtökin sjúkrahúsinu formlega heimasíðu FSN og var það Stefán Þorleifsson sem opnaði síðuna.

7. maí 2003

FRÍSKUR RÁÐHERRA Á ÞOLBRAUT Jón Kristjánsson heilbrigðisráðherra prófar nýja þolbraut FSN og hitar upp fyrir lokasprett kosninga- báráttunnar. Mynd: Mbl.is

>> Lumir þú á frétt eða fréttatilkynningu varðandi FSN og Heilsugæsluna
eða e-u öðru þessu viðkomandi máttu gjarnan láta okkur vita.