Skurðaðgerðir með kviðsjá

Skurðaðgerðir með kviðsjá (laparoscopic surgery) fara þannig fram að mjórri myndavél er stungið inn um gat sem er yfirleitt gert á nafla sjúklingsins, og verkfærum er stungið inn um
2 - 4 göt sem gerð eru á ýmsum stöðum á kviðveggnum. Þessi aðgerðatækni hefur náð að festa sig vel í sessi á undanförnum tveimur áratugum, og það hefur sýnt sig í fjöldamörgum rannsóknum að kviðsjáraðgerðir standa opnum skurðaðgerðum framar á mörgum sviðum. Með þessari tækni verða sárin á kviðnum mun minni en við opna aðgerð, og það skilar sér í styttri sjúkralegu og skjótari bata. Kviðsjáraðgerðir valda minni samgróningum í kvið samanborið við opnar aðgerðir, en samgróningar eru oft til vandræða seinna meir.
Til að geta framkvæmt þessa tegund aðgerða þarf skurðlæknirinn sérstaka þjálfun.

Algengustu kviðsjáraðgerðir eru brottnám á gallblöðru vegna gallsteina, brottnám á botnlanga, offituaðgerðir og aðgerðir vegna vélindabakflæðis. Einnig er aðgerðin oft notuð til greiningar á kviðverkjum að undangengnum öðrum rannsóknum, og til losunar á samgróningum. Ýmislegt fleira er hægt að gera með kviðsjártækni, og á eftir að koma í ljós hvaða fleiri kviðsjáraðgerðir eiga eftir að verða "rútínuaðgerðir". Á FSN er boðið upp á brottnám á gallblöðru og botnlanga með kviðsjártækni þegar við á, sem og til greiningar á orsökum kviðverkja og samvaxtalosun. Einnig framkvæma kvensjúkdómalæknar sem heimsækja FSN algengar kvensjúkdómaaðgerðir með kviðsjá eins og ófrjósemisaðgerðir.

Upplýsingar til sjúklinga um brottnám gallblöðru með kviðsjá